Num 24 | CopSahBible2 | STEP | ⲁⲩⲱ ⲁϥⲛⲁⲩ ⲛϭⲓ ⲃⲁⲗⲁϩⲁⲙ ϫⲉ ⲟⲩⲡⲉⲧⲛⲁⲛⲟⲩϥ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ ⲡⲉ ⲥⲙⲟⲩ ⲉⲡ ⲓ︤ⲏ︦ⲗ︥ ⲙⲡϥⲃⲱⲕ ⲕⲁⲧⲁ ⲡⲉϥⲥⲱⲛⲧ ⲉⲧⲱⲙⲧ ⲉⲣⲟϥ ϩⲛ ⲟⲩⲙⲛⲧⲉⲣⲉϥϫⲓⲙⲁⲉⲓⲛ ⲁⲗⲗⲁ ⲁϥⲕⲱⲧⲉ ⲡⲉϥϩⲟ ⲉⲧⲉⲣⲏⲙⲟⲥ

Numbers 24

1 ⲁⲩⲱ ⲁϥⲛⲁⲩ ⲛϭⲓ ⲃⲁⲗⲁϩⲁⲙ ϫⲉ ⲟⲩⲡⲉⲧⲛⲁⲛⲟⲩϥ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ ⲡⲉ ⲥⲙⲟⲩ ⲉⲡⲓ︤ⲏ︦ⲗ︥ ⲙⲡϥⲃⲱⲕ ⲕⲁⲧⲁ ⲡⲉϥⲥⲱⲛⲧ ⲉⲧⲱⲙⲧ ⲉⲣⲟϥ ϩⲛ ⲟⲩⲙⲛⲧⲉⲣⲉϥϫⲓⲙⲁⲉⲓⲛ ⲁⲗⲗⲁ ⲁϥⲕⲱⲧⲉ ⲡⲉϥϩⲟ ⲉⲧⲉⲣⲏⲙⲟⲥ 2 ⲁⲩⲱ ⲁⲃⲁⲗⲁϩⲁⲙ ϥⲓ ⲛⲛⲉϥⲃⲁⲗ ⲉϩⲣⲁⲓ ⲁϥⲛⲁⲩ ⲉⲡⲓ︤ⲏ︦ⲗ︥ ⲉϥⲙⲟⲟϣⲉ ⲕⲁⲧⲁ ⲟⲩⲣϣⲉ ⲁⲩⲱ ⲁⲡⲉⲡ︤ⲛ︦ⲁ︥ ⲙⲡⲛⲟⲩⲧⲉ ϣⲱⲡⲉ ⲉϩⲣⲁⲓ ⲉϫⲱϥ 3 ⲁⲩϫⲓ ⲛⲧⲉϥⲡⲁⲣⲁⲃⲟⲗⲏ ⲡⲉϫⲁϥ ⲛϭⲓ ⲃⲁⲗⲁϩⲁⲙ ⲡϣⲏⲣⲉ ⲛⲃⲉⲱⲣ ⲡⲉϫⲁϥ ⲛϭⲓ ⲡⲣⲱⲙⲉ ⲉⲧⲉⲓⲱⲣϩ ⲛⲁⲙⲉ 4 ⲡⲁⲓ ⲉⲛⲧⲁϥⲛⲁⲩ ⲉⲑⲟⲣⲁⲥⲓⲥ ⲙⲡⲛⲟⲩⲧⲉ ϩⲛ ⲟⲩⲱⲃϣ ⲉⲣⲉⲛⲉϥⲃⲁⲗ ϭⲟⲗⲡ ⲉⲃⲟⲗ 5 ⲉϣϫⲉ ⲛⲁⲛⲟⲩⲛⲉⲕⲏⲉⲓ ⲓⲁⲕⲱⲃ ⲛⲉⲕⲥⲕⲏⲛⲏ ⲡⲓ︤ⲏ︦ⲗ︥ 6 ⲛⲑⲉ ⲛⲛⲉⲕⲣⲱⲟⲩ ⲉⲧⲟ ⲛϩⲁⲉⲓⲃⲉⲥ ⲁⲩⲱ ⲛⲑⲉ ⲛⲛⲡⲁⲣⲁⲇⲉⲓⲥⲟⲥ ⲉⲧϩⲓϫⲛⲛⲉⲓⲉⲣⲱⲟⲩ ⲁⲩⲱ ⲛⲑⲉ ⲛⲉⲓⲥⲕⲩⲛⲏ ⲛⲁⲓ ⲛⲧⲁⲡⲛⲟⲩⲧⲉ ⲡⲏⲥⲥⲉ ⲙⲙⲟⲟⲩ ⲁⲩⲱ ⲛⲑⲉ ⲛⲛⲉⲓⲕⲉⲇⲣⲟⲥ ⲉⲧϩⲓϫⲛⲙⲙⲟⲟⲩ 7 ⲁⲩⲱ ⲟⲩⲣⲱⲙⲉ ⲛⲏⲩ ⲉⲃⲟⲗ ϩⲙ ⲡⲉϥⲥⲡⲓⲣ ⲛϥⲣϫⲟⲉⲓⲥ ⲉⲩⲙⲏⲏϣⲉ ⲛϩⲉⲑⲛⲟⲥ ⲛϥϫⲓⲥⲉ ⲉϩⲟⲩⲉ ⲧⲙⲛⲧⲣⲣⲟ ⲛⲅⲱⲅ ⲁⲩⲱ ⲛⲥⲁⲩⲝⲁⲛⲉ ⲛϭⲓ ⲧⲉϥⲙⲛⲧⲣⲣⲟ 8 ϫⲉ ⲡⲛⲟⲩⲧⲉ ⲡⲉⲛⲧⲁϥϫⲓⲙⲟⲉⲓⲧ ϩⲏⲧϥ ⲉϥⲛⲏⲩ ⲉⲃⲟⲗ ϩⲛ ⲕⲏⲙⲉ ⲛⲑⲉ ⲙⲡⲉⲟⲟⲩ ⲙⲡⲙⲟⲛⲟⲅⲉⲣⲟⲥ ⲛⲁϥ ϫⲉ ϥⲛⲁⲟⲩⲱⲙ ⲛⲉⲛϩⲉⲑⲛⲟⲥ ⲙⲛ ⲛⲉϥϫⲓⲛϫⲉⲉⲩ ⲛϥⲟⲩⲱⲙ ⲟⲛ ⲛⲛⲉⲩⲛⲟⲙⲧⲉ ⲙⲛ ⲛⲉⲩⲁⲗⲧⲕⲁⲥ ϥⲛⲁⲥⲱⲙⲧ ⲙⲡⲉϥϫⲁϫⲉ ϩⲓⲧⲛ ⲛⲉϥⲥⲟⲧⲉ 9 ⲁϥⲣⲁⲕⲧϥ ⲁϥⲉⲙⲧⲟⲛ ⲙⲙⲟϥ ⲛⲑⲉ ⲛⲛⲉⲓⲙⲟⲩⲓ ⲛⲓⲙ ⲡⲉⲧⲛⲁϣⲧⲟⲩⲛⲟⲥϥ ⲛⲉⲧⲥⲙⲟⲩ ⲉⲣⲟⲕ ⲥⲉⲥⲙⲁⲙⲁⲁⲧ ⲁⲩⲱ ⲛⲉⲧⲥⲁϩⲟⲩ ⲙⲙⲟⲕ ⲥⲉⲥϩⲟⲩⲟⲣⲧ 10 ⲁⲃⲁⲣⲁⲕ ⲛⲟⲩϭⲥ ⲉϫⲛ ⲃⲁⲗⲁϩⲁⲙ ⲁϥⲣⲱϩⲧ ⲛⲛⲉϥϭⲓϫ ⲉϫⲛ ⲛⲉⲩⲉⲣⲏⲩ ⲁⲩⲱ ⲡⲉϫⲁϥ ⲛϭⲓ ⲃⲁⲣⲁⲕ ⲛⲃⲁⲗⲁϩⲁⲙ ϫⲉ ⲙⲛⲧⲁⲓⲙⲟⲩⲧⲉ ⲉⲣⲟⲕ ⲉⲥϩⲟⲩⲉⲣⲡⲁϫⲁϫⲉ ⲛⲁⲓ ⲁⲩⲱ ⲉⲓⲥ ϩⲏⲏⲧⲉ ϩⲛ ⲟⲩⲥⲙⲟⲩ ⲁⲕⲥⲙⲟⲩ ⲉⲣⲟϥ ⲡⲙⲉϩϣⲟⲙⲛⲧ ⲛⲥⲟⲡ ⲡⲉ ⲡⲁⲓ 11 ⲧⲉⲛⲟⲩ ϭⲉ ⲃⲱⲕ ⲉϩⲣⲁⲓ ⲉⲡⲉⲕⲙⲁ ⲛⲉⲁⲓϫⲟⲟⲥ ⲡⲉ ϫⲉ ϯⲛⲁⲧⲁⲓⲟⲕ ⲧⲉⲛⲟⲩ ϭⲉ ⲁⲡⲛⲟⲩⲧⲉ ⲁⲡⲟⲥⲧⲉⲣⲓ ⲙⲙⲟⲕ ⲉⲡⲉⲟⲟⲩ 12 ⲛⲧⲉⲣⲉⲃⲁⲗⲁϩⲁⲙ ⲙⲛ ⲃⲁⲣⲁⲕ ϫⲉ ⲛⲁⲓ ⲡⲉϫⲉⲃⲁⲗⲁϩⲁⲙ ⲛⲃⲁⲣⲁⲕ ϫⲉ ⲙⲏ ⲙⲡⲉⲓϫⲟⲟⲥ ⲉⲛⲉⲕⲃⲁⲓϣⲓⲛⲉ ⲛⲧⲁⲕⲧⲛⲛⲟⲟϫⲥⲟⲩ ϣⲁⲣⲟⲓ 13 ϫⲉ ⲉϣⲱⲡⲉ ⲉⲣϣⲁⲛⲃⲁⲣⲁⲕ ϯ ⲛⲁⲓ ⲙⲡⲉϥⲏⲓ ⲧⲏⲣϥ ⲉϥⲙⲏϩ ⲛⲛⲟⲩⲃ ϩⲓ ϩⲁⲧ ⲙⲛϭⲟⲙ ⲙⲙⲟⲓ ⲉⲡⲁⲣⲁⲃⲁ ⲙⲡϣⲁϫⲉ ⲙⲡϫⲟⲉⲓⲥ ⲉⲧⲣⲁⲁϥ ⲛⲟⲩⲡⲉⲑⲟⲟⲩ ⲏ ⲟⲩⲡⲉⲧⲛⲁⲛⲟⲩϥ ϩⲁⲣⲟⲓ ⲙⲁⲩⲁⲁⲧ 14 ⲡⲛⲟⲩⲧⲉ ⲛⲁϫⲟⲟⲩ ⲛⲁⲓ ⲛⲉϯⲛⲁⲧⲁⲩⲟⲟⲩ ⲁⲩⲱ ⲧⲉⲛⲟⲩ ϯⲛⲁⲡⲱⲧ ⲉϩⲣⲁⲓ ⲉⲡⲁⲙⲁ ⲁⲙⲟⲩ ⲧⲁϫⲓϣⲟϫⲛⲉ ⲛⲁⲕ ϫⲉ ⲉⲣⲉⲡⲉⲓⲗⲁⲟⲥ ⲛⲁⲣ ⲟⲩ ⲙⲡⲉⲕⲗⲁⲟⲥ ϩⲛ ⲑⲁⲏ ⲛⲛⲉϩⲟⲟⲩ 15 ⲁⲩⲱ ⲛⲧⲉⲣⲉϥⲕⲧⲟϥ ⲉⲧⲉϥⲡⲁⲣⲁⲃⲟⲗⲏ ⲡⲉϫⲁϥ ϫⲉ ⲡⲉϫⲉⲃⲁⲗⲁϩⲁⲙ ⲡϣⲏⲣⲉ ⲛⲃⲉⲱⲣ ⲡⲉϫⲉⲡⲣⲱⲙⲉ ⲉⲧⲓⲱⲣϩ ϩⲛ ⲟⲩⲙⲉ 16 ⲉⲧⲥⲱⲧⲙ ⲉⲛϣⲁϫⲉ ⲙⲡⲛⲟⲩⲧⲉ ⲉⲧⲥⲟⲟⲩⲧⲛ ⲛⲟⲩⲥⲃⲱ ⲉⲃⲟⲗ ϩⲓⲧⲙ ⲡⲉⲧϫⲟⲥⲉ ⲉⲧⲛⲁⲩ ⲉⲩϩⲟⲣⲁⲥⲓⲥ ⲛⲧⲉⲡⲛⲟⲩⲧⲉ ϩⲛ ⲟⲩϩⲓⲛⲏⲃ ⲉⲣⲉⲛⲉϥⲃⲁⲗ ϭⲟⲗⲡ ⲉⲃⲟⲗ 17 ϯⲛⲁⲧⲁⲩⲟϥ ⲁⲩⲱ ⲧⲉⲛⲟⲩ ⲟⲛ ϯⲛⲁⲥⲙⲟⲩ ⲁⲩⲱ ⲛϥⲛⲁϩⲱⲛ ⲉϩⲟⲩⲛ ⲁⲛ ⲟⲩⲛⲟⲩⲥⲓⲟⲩ ⲛⲁϣⲁ ⲉⲃⲟⲗ ϩⲛ ⲓⲁⲕⲱⲃ ⲁⲩⲱ ⲟⲩⲛⲟⲩⲣⲱⲙⲉ ⲛⲁⲧⲱⲟⲩⲛ ⲉⲃⲟⲗ ϩⲙ ⲡⲓ︤ⲏ︦ⲗ︥ ϥⲛⲁⲟⲩⲱϣϥ ⲛⲛⲁⲣⲭⲏⲅⲟⲥ ⲙⲙⲱⲁⲃ ϥⲛⲁϣⲱⲗ ⲛⲛϣⲏⲣⲉ ⲧⲏⲣⲟⲩ ⲉⲛⲥⲏⲑ 18 ⲉⲇⲱⲙ ϥⲛⲁϣⲱⲡⲉ ⲛⲟⲩⲕⲗⲏⲣⲟⲛⲟⲙⲓⲁ ⲏⲥⲁⲩ ⲡⲉϥϫⲁϫⲉ ϥⲛⲁϣⲱⲡⲉ ⲛⲟⲩⲕⲗⲏⲣⲟⲛⲟⲙⲉⲓⲁ ⲡⲓ︤ⲏ︦ⲗ︥ ⲇⲉ ⲁϥⲉⲓ ⲉϩⲣⲁⲓ ϩⲛ ⲟⲩϭⲟⲙ 19 ϥⲛⲁⲧⲱⲟⲩⲛ ⲉⲃⲟⲗ ϩⲛ ⲓⲁⲕⲱⲃ ⲛϥⲧⲁⲕⲟ ⲙⲡⲉⲧⲛⲁⲟⲩϫⲁⲓ ⲉⲃⲟⲗ ϩⲛ ⲧⲡⲟⲗⲓⲥ 20 ⲁⲩⲱ ⲛⲧⲉⲣⲉϥⲛⲁⲩ ⲉⲡⲁⲙⲁⲗⲏⲕ ⲁϥⲕⲟⲧϥ ⲉⲧⲉϥⲡⲁⲣⲁⲃⲟⲗⲏ ⲡⲉϫⲁϥ ϫⲉ ⲟⲩⲁⲣⲭⲏ ⲛⲧⲉ ⲛϩⲉⲑⲛⲟⲥ ⲡⲉ ⲡⲁⲙⲁⲗⲏⲕ ⲡⲉϥⲥⲡⲉⲣⲙⲁ ⲛⲁⲧⲁⲕⲟ 21 ⲁⲩⲱ ⲛⲧⲉⲣⲉϥⲛⲁⲩ ⲉⲕⲁⲓⲛⲉⲟⲥ ⲁϥⲕⲟⲧϥ ⲉⲧⲉϥⲡⲁⲣⲁⲃⲟⲗⲏ ⲡⲉϫⲁϥ ϫⲉ ϥϫⲟⲟⲣ ⲛϭⲓ ⲡⲉⲕⲙⲁⲛⲟⲩⲱϩ ⲁⲩⲱ ⲉⲕϣⲁⲛⲕⲁⲛⲉⲕϣⲏⲣⲉ ϩⲣⲁⲓ ϩⲛ ⲟⲩⲡⲉⲧⲣⲁ 22 ⲁⲩⲱ ⲉⲩϣⲁⲛϣⲱⲡⲉ ⲛⲃⲉⲱⲣ ⲛϭⲓ ϩⲉⲛϣⲏⲣⲉ ⲙⲡⲁⲛⲟⲩⲣⲅⲟⲥ ⲛⲁⲥⲥⲩⲣⲓⲟⲥ ⲛⲁⲁⲓⲭⲙⲁⲗⲱⲧⲉⲩⲉ ⲙⲙⲟⲕ 23 ⲁⲩⲱ ⲁϥⲕⲟⲧϥ ⲟⲛ ⲉⲧⲉϥⲡⲁⲣⲁⲃⲟⲗⲏ ⲡⲉϫⲁϥ ϫⲉ ⲱ ⲛⲓⲙ ⲡⲉⲧⲛⲁϣⲱⲡⲉ ⲉⲣϣⲁⲛⲡⲛⲟⲩⲧⲉ ⲕⲁⲛⲁⲓ 24 ⲁⲩⲱ ϥⲛⲏⲩ ⲉⲃⲟⲗ ϩⲛ ⲛϭⲓϫ ⲉⲛϭⲓⲇⲣⲉⲱⲥ ⲛⲥⲉⲑⲙⲕⲟ ⲛⲛⲁⲥⲥⲟⲩⲣ ⲥⲉⲛⲁⲙⲉⲕϩ ⲛϩⲉⲃⲣⲁⲓⲟⲥ ⲁⲩⲱ ⲛⲧⲟⲟⲩ ϩⲓ ⲟⲩⲥⲟⲡ ⲥⲉⲛⲁⲧⲁⲕⲟ 25 ⲛⲧⲉⲣⲉⲃⲁⲗⲁϩⲁⲙ ⲇⲉ ⲧⲱⲟⲩⲛ ⲁϥⲃⲱⲕ ⲁϥⲕⲧⲟϥ ⲉϩⲣⲁⲓ ⲉⲡⲉϥⲙⲁ ⲃⲁⲗⲁⲕ ϩⲱⲱϥ ⲁϥⲕⲧⲟϥ ⲉϩⲣⲁⲓ ⲉⲡⲉϥⲏⲓ